اللى تحسبه مرسى يطلع حسنى (رائعة جدا أقرأ)

هنحاول انهاردة نعمل تجربة مع بعض و نشوف ايه النتائج اللى هنوصلها من التجربة دى ، بس قبلها أحب أفكرك بس بحقيقية ممكن تكون وقعت منك فى باكابورت الأحداث
اللى عايشينه الأيام دى

نبتدى بالحقيقة : حسنى مبارك قعد معانا 30 سنة رئيس – و كان رئيس منتخب فى انتخابات رئاسية سنة 2005- وصلنا فيهم مرة واحدة لكأس العالم و خدنا 5 مرات كأس أمم أفريقيا و خبطنا قطارات و غرقنا عبارات ، و فى الآخر عملنا ثورة.. أنا مش هقولك إن حسنى مبارك سرق و قتل و زور و الحاجات دى كلها ، أنا هأقولك الحقيقة الوحيدة اللى عندنا : حسنى مبارك اتحاكم و خد 25 سنة سجن بتهمة " الإهمال فى حماية المتظاهرين السلميين " بس ( ركز فى التهمة دى لأن هو ده موضوع حلقتنا إنهارده )

التجربة من خطوتين ، خطوة عليك و خطوة عليا
نبتدى بالخطوة اللى عليك : عايزك تمسك صورة للرئيس محمد مرسى، و حاول تحبه ، انظر للصورة نظرة شغف بس حاول متركزش أوى فى بقه عشان الحب ميروحش و التجربة كلها تبوظ .. شيل أى سوء نية فى خيالك من ناحية الرئيس مرسى فى أى حاجة هتقراها و افترض معايا إنه أجمل و ألذ و أحن كائن فى الوجود و إن المعارضة و الشعب هم اللى ظالمينه .. اتفقنا ؟
أنا بقى على إنى أسردلك أهم الأحداث اللى حصلت فى عهد الرئيس محمد مرسى .. و نحاول بعدها نلاقى أى فايدة للى أنا و انت بنعمله ده

-          بعد 100 يوم من حكم مرسى ، المعارضة قررت تعمل مليونية فى التحريرو سميتها " مليونية الحساب " عشان تحاسب الرئيس على أول 100 يوم قضاهم معانا ، حصل اشتباكات بين المعارضة و شباب الإخوان و نتائج اليوم ده كانت 147 مصاب
-          شباب الثورة راحوا يحيوا الذكرى السنوية لأحداث محمد محمود ، و حصل مناوشات بينهم و بين الأمن عند شارع محمد محمود و توفى جيكا أحد شباب الثورة
-          الرئيس صحى فى يوم من الأيام و أصدر إعلان دستورى مش مهم بيحتوى على إيه ، المهم إن نفس المعارضة اللى فوق اعترضت و نزلت التحرير و عملت مسيرات و مليونيات لكن الرئيس برضه أصر على الإعلان. المعارضة قررت إنها تعمل مليونية يوم الثلاثاء عند الإتحادية عشان توصل صوتها للرئيس ( على أساس إنه مكنش واصل ) ، يوم التلات خلص و جه الأربع ، راح شباب الإخوان عند القصر و حصلت مناوشات و خناقات بينهم و بين المعتصمين و نتيجة اليوم كانت 10 حالات وفاة و حوالى 1500 مصاب
-          من تبعات الإعلان الدستورى برضه ، المعارضة راحت حرقت مقرات الإخوان و الحرية و العدالة فى محافظات كتيرة و توفى إسلام مسعود أحد شباب الإخوان
-          أنصار حازم صلاح أبو اسماعيل راحوا حرقوا مقر حزب الوفد فى الدقي و مقر التيار الشعبى
-          فى بقى شوية أحداث على جنب كدة – حاجات لايت يعنى - زى مثلا استشهاد 7 عساكر فى رفح ، حادثة الأتوبيس اللى مات فيها حوالى 50 طفل ، ضرب أبو العز الحريرى ، ضرب محمد أبو حامد ، ضرب السفير يحيى نجم ، سحل متظاهرين و التحقيق معاهم جوة قصر الإتحادية

بعد سرد كل الأحداث دى و من غير ما نقول مين ضرب مين ، الإعلان الدستورى صح و لا لأ ، مع و لا ضد الدستور ، إحنا قدام حقيقة واضحة دلوقتى و هى إن المصريين
بيضربوا و يقتلوا فى بعض. لما نحط الحقيقة دى على الحقيقة اللى قلتهالك فى الأول، نقدر نكتشف إن الرئيس مرسى ما سبش فئة فى البلد مأهملش فى حمايتها ، الرئيس مرسى محماش العساكر ، الرئيس مرسى محماش الأطفال ، الرئيس مرسى محماش الفلول ، الرئيس مرسى محماش الثوار ، الرئيس مرسى محماش حتى الإخوان ، الرئيس مرسى محماش حد – و بالمناسبة دى كانت الحالة الوحيدة اللى كان فيها رئيس لكل المصريين - بس رئيس فاشل يفشل فشلا ذريعا و واجب محاكمته بنفس التهمة بتاعة حسنى مبارك و هى الإهمال فى حماية المتظاهرين و المواطنين كمان. المرشد محمد بديع طلع قال إن كل اللى ماتوا فى الإتحادية كانوا من شباب الإخوان ، طب أنا هأعلى علي المرشد كمان و هطلب منك طلب تانى معلش : عايزك توصل معايا بحسن النية فى الرئيس و جماعة الإخوان لدرجة السذاجة و تبتدى تنزل ريالة من بقك و انت بتقرا و افترض معايا إن مش بس كل اللى ماتوا فى الاتحادية كانوا إخوان ، لأ ده كل اللى ماتوا و اتصابوا فى مصر فى عهد محمد مرسى كانوا إخوان بما فيهم عساكر رفح و أطفال أسيوط .. طب السؤال هنا : طب هم مش الإخوان دول مواطنين مصريين برضه و واجب على الرئيس حمايتهم ؟! الإجابة : أيوة ، مواطنين مصريين بس برضه الرئيس مرسى محماهمش، يبقى الرئيس مرسى لازم يتحاكم برضه بتهمة الإهمال فى حماية المتظاهرين .. بقولك إيه أنا هشاركك دلوقتى الريالة و أنا بكتب و أقولك تعالى نصدق كل كلام الإخوان إن المعارضين عملاء و خونة و هم اللى بيخربوا فى البلد و إن البرادعى هو مصدر الهولوكست فى البلاد و هو اللى قتل عمار الشريعى و طلع بعدها يخطف محمد مرسى كمان .. يا سيدى هات أدلة – من غير تلفيق – إن المعارضة هى اللى عملت كل ده و اقبض عليهم كلهم و كلف النيابة بالتحقيق معاهم و ساعتها و ربنا أنا هنزل أهتفلك فى التحرير لوحدى " يعيش مرسى فشيخ المعارضين ". لكن الرئيس مرسى برضه معملش كدة و مش هيقدر يعمل كدة لإنه عارف إن مفيش أدلة و لا مؤامرات و لا تعدى على الشرعية و لا الكلام الخايب ده .. مرسى رئيس منتخب و حسنى كمان كان رئيس منتخب و اللى حصل فى 25 يناير ده كان ثورة مش مؤامرة و اللى بيحصل دلوقتى اسمه رئيس خالف اليمين الدستورى و رئيس بقى على ايده و فى رقبته دم كتير ، مش معنى انه منتخب يبقى مطلوب مننا ان احنا اللى نستحمله 4 سنين أو إن احنا اللى نمشى

و أحب أقولك كمان إن محمد مرسى مكتفاش بإنه يبقى زى حسنى مبارك، هو قرر يتفوق عليه كمان. الرئيس مرسى وصلنا لمرحلة إن الناس كلها لازم تشيل سلاح لبعض و تبقى عاقبة الإدلاء برأى سياسى أو اقتصادى أو حتى جنسى فى البلد دى هى الموت. الرئيس مرسى وصل البلد إنها بقت على أبواب الحرب الأهلية بس هى مكسوفة تخشها لحد دلوقتى. و لو حصل و مدخلتهاش و الاقتصاد متعدلش، فالبلد أكيد داخلة على ثورة جياع و دى ناس لما تنزل مش هتبقى زى الشباب الكيوت اللطيف اللى نزل فى 25 يناير و هتف " عيش ، حرية ، عدالة إجتماعية " ، الناس دى مش فارقلها و لا إخوان و لا برادعى و لا حزب الدستور و لا الدستور نفسه و لا نيلة ، الناس دى عايزة مم ، عايزة تاكل يعنى. سرقت الثورة يا حبيبى و مبسوط بيها ؟! خليهالك ، غور بيها فى داهية ، هنعمل غيرها ، لكن مصر مش هتعرف تسرقها لإن البلد دى آخر حاجة باقية للفقرا فى دنياهم و معندهمش فلوس يروحوا حتة تانية غيرها و مش هيفرطوا فيها لحد
!!

 و دى كانت نهاية تجربة " حب الرئيس حتى الثمالة أو الريالة أيهما أقرب إلى قلبك " و برضه الثورة مستمرة  
مينا إيهاب
17-12-2012

Posted in: أخبار,اكتشافات,معلومات,منوعات